News/ Current Affairs

በሽግግር መንግስት ሰበብ ብሄራዊ ጥቅማችንንና ህልውናችንን አደጋ ላይ መጣል አይገባንም

በ አንተነህ መሉ

የኢትዮጵያ ብሔራዊ ምርጫ ቦርድ እንደ አዲስ ከተደራጀ በኋላ ሲሰራቸው የቆዩ ጉዳዮች እንዳሉ ሆነው ከፖለቲካ ፓርቲዎች ጋር ሲያደርግ የቆየው ውይይት በጣም አታካችና ረዥም ጊዜ የወሰደ እንደነበር የሚታወቅ ነው፡፡ በዚህ ሂደት ለተሻለ የዴሞክራሲያዊ ስርዐት ግንባታ ያግዛሉ ያላቸውን ስራዎች ሲሰራ የቆየና ለፖለቲካ ፓርቲዎቹ(ለነባሮቹም ሆነ ለአዲሶቹ) ህጋዊ ዕውቅና ለመስጠት ሰፊ ጊዜ ሰጥቶ ሂደቱን እንዲጨርሱ ያደረገበት ሁኔታም የቅርብ ጊዜ ትውስታ ነው፡፡(በዚህ መሀል የተጠበቀውን የአባላት ቁጥር በብሄራዊ ደረጃና በክልል ደረጃ ማሟላት ያልቻሉ እንዳሉ ሆነው ማለት ነው፡፡)

ይህንን ሂደት ካጠናቀቀ በኋላ የምርጫ ጊዜን መርሀ ግብር ማውጣትና ማስተዋወቅ የቻለ ቢሆንም በጊዜው ላይ በተለይም ክረምት ከመሆኑ አንፃር የሚነሱ ጉዳዮች እንዳሉ ሆነው ወደ ቅድመ ምርጫ ተግባራት በቅጡ እንኳን ሳይገባ የምድራችን ወረርሽኝ የተከሰተበትና በማይጠበቅ ሁኔታ ምስቅልቅል የፈጠረበትና የሚያደርሰውን ተፅዕኖ እንኳን በውሉ ያልተረዳነው ደንቃራ ከፊታችን የተደቅነበት የማይተነበይ ጊዜ ላይ ደርሰናል፡፡

የተፎካካሪ ፓርቲ አመራሮች ከጠቅላይ ሚኒስትሩ ጋር ውይይት ባደረጉበት ወቅት (ህዳር 18 2011ዓ.ም)

በአንድ በኩል ስድስተኛው የምርጫ ዘመን በብዙ መልኩ ተስፋ የተጣለበትና ሁሉን የፖለቲካ ፓርቲዎች የሚያሳትፍ በአይነቱ የመጀመሪያ እንደሆነ የሚገመት ለዴሞክራሲያዊ ስርዓት ግንባታ ጉልህ ሚና የሚጫወት እንደሆነም የሚጠበቅ ነው፡፡ ነገር ግን ከኮሮና ስጋት ጋር በተያያዘ ቀደም ብለው የተያዙት የቅድመ ምርጫ ስራዎች ሊሰሩ የሚችሉበት ከባቢያዊ ሁኔታ ባለመኖሩ ምርጫ ማካሄድ የማይቻልበት ሁኔታ እንደተፈጠረና ይህንንም መፍታት እንዲቻል ምርጫ ቦርድ ለተወካዮች ምክር ቤት እንዳቀረበ ምክር ቤቱም በጉዳዩ ላይ ወስኖ እንደሚያስፈፀም ይጠበቃል፡፡

ባለው አጠቃላይ ሁኔታ ስድስተኛው ብሔራዊ ምርጫ የተላለፈና በምርጫው ዘመን የሚከናወኑ ተግባራት ማለትም፡ የመራጮች ምዝገባ፤ ለመራጮች የሚሰጥ ትምህርት፤ የምረጡኝ ቅስቀሳና ሌሎችም ስራዎችም ከኮሮና ስጋት እንኳን ነፃ ብንወጣ በአጭር ጊዜ ማከናወን የማንችልበት ሁኔታ እንዳለ መገመት የሚከብድ አይመስልም፡፡ ከዚህ በኋላ የትኛው መፍትሄ የተሻለ ሀገራዊ መረጋጋትን ለማስፈን በቀጣይ ለሚከናወኑ የኢኮኖሚ፣ ፖለቲካዊና ማህበራዊ ጉዳዮች ይሆናል የሚለው ሲሆን መንግስት ካቀረባቸው አማራጮች አንዱ ላይ ሊወድቅ ግድ የሚልና በአነስተኛ ችግር መጪውን ጊዜ የተሻለ ለማድረግ ሕጋዊ ተቋማቱ የሚወስኑት ሁኔታ ይጠበቃል፡፡

በዚህ መሀል ግን የተፎካካሪ ፓርቲዎች ተሳባስበው የሽግግር መንገስት ይመስርቱ የሚለው ጨዋታ ግን የትም የማያደርሰን ስሌት ሲሆን ከሀገር በላይ የረዥም ጊዜ የፖለቲካ ስልጣንን መሻት ለማርካት ካልሆነ በስተቀር አሁን ባለው ፅንፍ የወጣ የፖለቲካ ፓርቲዎች ፕሮግምና እንቅስቃሴ እርባናም ያለው አማራጭ አይሆንም፡፡

እንዲያውም ባለፉት ጥቂት ወራት በፖለቲካ ፓርቲዎች የጋራ ምክር ቤት ለውይይት በቀረቡ በርካታ ሀገራዊ የፖለቲካ ጉዳዮች ላይ እንኳን ለመግባባትና ድምዳሜ ላይ ለመድረስ ይቅርና የአጀንዳ ቅደም ተከተል ለማስቀመጥ ምን ያህል አስቸጋሪ ሁኔታ እንዳሳለፉ ይታወቃል፡፡ በፖለቲካ ፓርቲዎቹ ዘንድ ብዙዎቹ ስብሰባዎች በጭቅጭቅና በወቀሳ የሚጠናቀቁ እንደነበር የሚታወቅ ሲሆን የሽግግር መንግስት ለመመስረትና ቀጣይ ኢኮኖሚያዊና ፖለቲካዊ እንዲሁም ሌሎች ጉዳዮችን መስመር ለማስያዝ የሚያስችል አውድ ሊፈጠር የሚችልበት እድል በጣም አነስተኛ እንደሆነ መረዳት ከባድ አይደለም፡፡

የሽግግር ጊዜያዊ መንግስት አሁን ባለንበት ነባራዊ ሁኔታ ወደ ባሰ ችግር ውስጥ የሚከተንና አለመረጋጋትን የሚያስከትል መሆኑ የባለፉት በርካታ አመታት ልምዶች ምስክሮች ናቸው፡፡ በቅርብ ካለፍንበት መፈናቀል፣ ግድያ፣ የጎበዝ አለቃ ዝርፍያ አጠቃላይ ሀገራዊ ስክነት ከጎደለበት በስሜት ከሚነዳ ፖለቲካዊ እንቅስቃሴ ውጪ የምናተርፈው ምንም ነገር የለም፡፡ በተራዘመው ጊዜ ውስጥና ከኮሮና ስጋት በተላቀቅንበት ሁኔታ ሁሉም የፖለቲካ ፓርቲዎች መስራት የሚገባቸውን ስራዎች ሰርተው ለሰለጠነ ፖለቲካ ከዚያም ሲያልፍ ህዝብ በሚሰጣቸው ይሁንታ የፖለቲካ ስልጣንን መያዝ ይጠበቅባቸዋል፡፡

ለሽግግር መንግስት ከሚጮሁት የበለጠ ለዘላቂ የዴሞክራሲ ስርዓት ሽግግር አጋዥ መሆን የሚችሉበትንና በእጃቸው ያለውን ወርቃማ እድል ድጋሚ ባለማምከን ይህንን በብዙ ስቃይና ችግር ውስጥ ያለፈን ህዝብ ማስቀደምና መካስ ይገባል፡፡ በአንድም ሆነ በሌላ መልኩ የፖለቲካ ትግል በማድረግ ለዚህ ለውጥ አስተዋጽኦ ያደረጉ የፖለቲካ አካላት የሀገርን ህልውናን ማስቀደም ካለንበት ድህነትና ኋላቀርነት የሚያወጡን ዘላቂ መፍትሄዎች ላይ ትኩረት ማድረግ ይገባቸዋል፡፡

የጠላቴ ጠላት ወዳጄ ነው አይነት ብሂል ግለሰቦችን ወይም የፖለቲካ ፓርቲዎችን ማየት ሳይሆን የሀገርን ብሄራዊ ጥቅምና ክብር ባስቀደመ መልኩ ከመጠላላፍና ከመወቃቀስ በመውጣት ለተወሰነ ጊዜ በስክነት የውስጥ አቅምን በማጠናከር መዘጋጀት የተሻለ ይሆናል፡፡ በጣም ባጠረ ጊዜ ውስጥ ከበሽታው ስጋት ነፃ በሆንን ጊዜ የምርጫው ስራዎች እንዲጀመሩ ግፊት ማድረግና እስከዚያው ህዝቡ ጥንቃቄ እንዲያደርግ የመሪነት ሚናቸውን እየተወጡ መቆየት ነው፡፡

በሽግግር መንግስት አይደለም በህዝብ በተመረጠ መንግስት በሚደረግ ውይይት እንኳን በቀላሉ ልንፈታቸው የማንችላቸው ሀገራዊ አጀንዳዎች ያሉባት ሀገር ናት፡፡ በዚያ ላይ የፖለቲካ ፓርቲዎች ባላፉት አስርት አመታት (በቅርብ የተቀላቀሉትን ጨምሮ) ምን ያህል ጫፍ የወጡ የፖለቲካ አቋሞች ላይ እንዳሉ ስናይ የሽግግር መንግስቱ የሁከትና የንትርክ ሊሆን እንደሚችል ማንም የሚያጣው ጉዳይ አይደለም፡፡

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s